Gal 4 | KhmKCB | STEP | ខ្ញុំចង់ និយាយ ដូច្នេះ កាលណា អ្នកស្នងមរតក នៅ ក្មេង នៅឡើយនោះ មិន ខុស ពី បាវបម្រើ ទេ ទោះបី ជា ម្ចាស់ លើអ្វីៗ ទាំងអស់ ក៏ដោយ

Galatians 4

1 ខ្ញុំចង់និយាយដូច្នេះកាលណាអ្នកស្នងមរតកនៅក្មេងនៅឡើយនោះមិនខុសពីបាវបម្រើទេទោះបីជាម្ចាស់លើអ្វីៗទាំងអស់ក៏ដោយ 2 ប៉ុន្តែគាត់ត្រូវស្ថិតនៅក្រោមមេការនិងអ្នកមើលការខុសត្រូវរហូតដល់ពេលដែលឪពុកបានកំណត់ទុក 3 រីឯយើងវិញក៏ដូច្នេះដែរពេលយើងនៅជាទារកនៅឡើយយើងបានជាប់នៅក្រោមគោលការណ៍បឋមរបស់លោកិយនេះ 4 លុះដល់ពេលកំណត់ហើយព្រះជាម្ចាស់ក៏ចាត់ព្រះរាជបុត្រារបស់ព្រះអង្គឲ្យមកប្រសូតពីស្ត្រីម្នាក់គឺឲ្យប្រសូតនៅក្រោមគម្ពីរវិន័យ 5 ដើម្បីលោះអស់អ្នកដែលស្ថិតនៅក្រោមគម្ពីរវិន័យឲ្យរួចនិងដើម្បីឲ្យយើងបានទទួលឋានៈជាកូន 6 ហើយដោយព្រោះអ្នករាល់គ្នាជាកូននោះព្រះជាម្ចាស់បញ្ជូនវិញ្ញាណនៃព្រះរាជបុត្រារបស់ព្រះអង្គឲ្យមកគង់នៅក្នុងចិត្តយើងគឺវិញ្ញាណនេះហើយដែលបន្លឺសំឡេងថាអ័ប្បា! ព្រះវរបិតាអើយ! 7 ដូច្នេះអ្នករាល់គ្នាមិនមែនជាបាវបម្រើទៀតទេប៉ុន្ដែជាកូនវិញហើយបើអ្នករាល់គ្នាជាកូនអ្នករាល់គ្នាក៏ជាអ្នកស្នងមរតកដោយសារព្រះជាម្ចាស់ដែរ 8 កាលអ្នករាល់គ្នាមិនទាន់ស្គាល់ព្រះជាម្ចាស់នៅឡើយអ្នករាល់គ្នាបានបម្រើព្រះទាំងឡាយដែលមិនមែនជាព្រះដ៏ពិត 9 ប៉ុន្តែឥឡូវនេះអ្នករាល់គ្នាស្គាល់ព្រះជាម្ចាស់ហើយតែស៊ូនិយាយថាព្រះជាម្ចាស់បានស្គាល់អ្នករាល់គ្នាវិញហេតុអ្វីបានជាអ្នករាល់គ្នាត្រលប់ទៅឯគោលការណ៍បឋមដ៏ទន់ខ្សោយនិងគ្មានតម្លៃម្ដងទៀតដូច្នេះ? តើអ្នករាល់គ្នាចង់បម្រើអ្វីៗទាំងនោះសាថ្មីទៀតឬ? 10 អ្នករាល់គ្នាប្រតិបត្ដិតាមថ្ងៃខែរដូវនិងឆ្នាំ។ 11 ចំពោះអ្នករាល់គ្នាខ្ញុំខ្លាចតែខ្ញុំធ្វើការនឿយហត់សម្រាប់អ្នករាល់គ្នាឥតប្រយោជន៍។ 12 បងប្អូនអើយ! ខ្ញុំសូមឲ្យអ្នករាល់គ្នាត្រលប់ដូចជាខ្ញុំដ្បិតខ្ញុំក៏បានត្រលប់ដូចជាអ្នករាល់គ្នាដែរ។ អ្នករាល់គ្នាមិនបានធ្វើអ្វីខុសនឹងខ្ញុំទេ 13 អ្នករាល់គ្នាដឹងថាកាលពីមុនខ្ញុំបានប្រកាសដំណឹងល្អប្រាប់អ្នករាល់គ្នាដោយភាពកម្សោយខាងសាច់ឈាមរបស់ខ្ញុំ 14 ហើយទោះបីមានសេចក្ដីល្បួងចំពោះអ្នករាល់គ្នាដោយសារសាច់ឈាមរបស់ខ្ញុំក៏ដោយក៏អ្នករាល់គ្នាមិនបានមើលងាយឬស្អប់ខ្ពើមខ្ញុំដែរផ្ទុយទៅវិញអ្នករាល់គ្នាបានទទួលខ្ញុំដូចជាទេវតារបស់ព្រះជាម្ចាស់ឬដូចជាព្រះគ្រិស្ដយេស៊ូ។ 15 ដូច្នេះតើអំណរដែលអ្នករាល់គ្នាមានពីមុននោះនៅឯណា? ដ្បិតខ្ញុំធ្វើបន្ទាល់អំពីអ្នករាល់គ្នាថាបើអាចធ្វើបានអ្នករាល់គ្នានឹងខ្វេះភ្នែកឲ្យខ្ញុំហើយ។ 16 ដូច្នេះតើខ្ញុំត្រលប់ជាខ្មាំងសត្រូវរបស់អ្នករាល់គ្នាដោយព្រោះខ្ញុំនិយាយសេចក្ដីពិតឬ? 17 ពួកគេសង្វាតចង់បានអ្នករាល់គ្នាមិនមែនដោយបំណងល្អទេផ្ទុយទៅវិញពួកគេចង់បំបែកអ្នករាល់គ្នាចេញពីយើងដើម្បីឲ្យអ្នករាល់គ្នាសង្វាតចង់បានពួកគេវិញ។ 18 ល្អហើយដែលសង្វាតចង់បានការល្អជានិច្ចមិនមែនតែនៅពេលដែលខ្ញុំនៅជាមួយអ្នករាល់គ្នាប៉ុណ្ណោះទេ។ 19 កូនអ្នករាល់គ្នាអើយ! ដើម្បីអ្នករាល់គ្នាខ្ញុំឈឺចាប់ម្ដងទៀតដូចគេសម្រាលកូនទម្រាំព្រះគ្រិស្ដមានរូបរាងនៅក្នុងអ្នករាល់គ្នា។ 20 ខ្ញុំចង់នៅជាមួយអ្នករាល់គ្នានាពេលឥឡូវនេះនិងផ្លាស់ប្ដូរសំដីរបស់ខ្ញុំព្រោះខ្ញុំទ័លគំនិតអំពីអ្នករាល់គ្នាហើយ។ 21 ឱពួកអ្នកចង់នៅក្រោមក្រឹត្យវិន័យអើយ! សូមប្រាប់ខ្ញុំមើល៍តើអ្នករាល់គ្នាមិនឮសេចក្ដីដែលក្រឹត្យវិន័យចែងទេឬ? 22 ដ្បិតមានសេចក្ដីចែងទុកថាលោកអ័ប្រាហាំមានកូនប្រុសពីរនាក់គឺម្នាក់កើតពីស្ត្រីជាអ្នកបម្រើហើយម្នាក់ទៀតកើតពីស្ត្រីជាអ្នកមានសេរីភាព 23 ប៉ុន្តែកូនដែលកើតពីស្ត្រីជាអ្នកបម្រើបានកើតតាមសាច់ឈាមរីឯកូនដែលកើតពីស្ត្រីជាអ្នកមានសេរីភាពបានកើតតាមសេចក្ដីសន្យា។ 24 នេះជាការប្រៀបធៀបគឺស្ដ្រីទាំងពីរនាក់នេះជាកិច្ចព្រមព្រៀងពីរមួយមកពីភ្នំស៊ីណាយដែលបានបង្កើតកូនសម្រាប់ភាពជាបាវបម្រើនោះជានាងហាការ។ 25 នាងហាការជាភ្នំស៊ីណាយនៅស្រុកអារ៉ាប់ក៏ដូចជាក្រុងយេរូសាឡិមនាសព្វថ្ងៃនេះដែរព្រោះនាងត្រូវនៅជាបាវបម្រើជាមួយកូនចៅរបស់នាង 26 តែក្រុងយេរូសាឡិមដែលនៅស្ថានលើវិញគឺជាស្ត្រីជាអ្នកមានសេរីភាពដែលជាម្ដាយរបស់យើង។ 27 ដ្បិតមានសេចក្ដីចែងទុកថាឱស្ត្រីអារដែលមិនបង្កើតកូនអើយ! ចូរអរសប្បាយឡើងឱស្ត្រីដែលមិនស្គាល់ការឈឺចាប់នៅពេលសម្រាលកូនអើយ! ចូរបន្លឺសំឡេងហើយស្រែកចុះព្រោះកូនរបស់ស្ត្រីឯកោមានច្រើនជាងកូនរបស់ស្ត្រីដែលមានប្ដីទៅទៀត។ 28 បងប្អូនអើយ! អ្នករាល់គ្នាជាកូនតាមសេចក្ដីសន្យាដូចលោកអ៊ីសាកដែរ 29 ប៉ុន្តែពេលនោះកូនដែលកើតតាមសាច់ឈាមបានបៀតបៀនកូនដែលកើតតាមព្រះវិញ្ញាណជាយ៉ាងណាឥឡូវនេះក៏យ៉ាងនោះដែរ 30 តើបទគម្ពីរចែងយ៉ាងដូចម្ដេចគឺចែងថា៖ «ចូរដេញស្ត្រីជាអ្នកបម្រើនិងកូនប្រុសរបស់នាងចេញទៅដ្បិតកូនប្រុសរបស់ស្ត្រីជាអ្នកបម្រើមិនត្រូវទទួលមរតកជាមួយកូនប្រុសរបស់ស្ត្រីជាអ្នកមានសេរីភាពឡើយ» 31 ដូច្នេះបងប្អូនអើយ! យើងមិនមែនជាកូនរបស់ស្ដ្រីជាអ្នកបម្រើទេគឺជាកូនរបស់ស្ត្រីជាអ្នកមានសេរីភាពវិញ។